Bashkë me fluksin e pushuesve të huaj në Shqipëri ka njohur rritje edhe turizmi i brendshëm.

Vetëm në muajin Mars strukturat akomoduese kanë regjistruar 47 mijë pushues shqiptarë, 22% më shumë sesa po e njëjta periudhë e një viti më parë.

Zgjerimi i ofertës turistike në vend edhe kureshtja për të parë vende të pavizituara më parë duket se kanë ndikuar në këtë trend pozitiv.

“Ka vlerë shumë edhe pjesa e ngritjes së turistëve të huaj, se na bëjnë edhe ne më shumë kureshtar. Por elementi i shtimit të turistëve të huaj ka sjellë edhe ngritjen e cilësisë dhe të ketë më shumë akses. Këtë vit shikojmë një rritje të ofertës, me shumë agroturizme, më shumë hotele”, thotë tur-operatori Aneo Hila.

Sipas të dhënave të INSTAT, në muajin Mars pjesa më e madhe e shqiptarëve kanë vizituar rajonin qëndror dhe jugor të vendit.

“Kemi pasur guida të vazhdueshme për pjesën e Korçës, Voskopojës, Permetit, gjithë Lugina e Vjosës. Janë moshat aktive që kanë qejf të dalin dhe në natyrë dhe të provojnë gjëra të reja, pjesa familjare dominon s ai përket turizmit vendas”.

Për tre muajt e parë të vitit, pushuesit vendas zënë rreth 43% të totalit të pushuesve të regjistruar në struktura akomoduese./Tv Klan